मेरो पनि जिन्दगी पीरले भरिएको छ

Rahasya Bikram Chimariya

मेरो पनि जिन्दगी पीरले भरिएको छ। 
म हिँड्ने धरातल भीरले भरिएको छ।। 

यहाँ अधर्मीहरुले बास गरेका छन्, 
त्यसैले यो शहर मन्दिरले भरिएको छ।। 

यही जानेर चराहरु आकाशमै रम्छन्, 
मान्छे बाँच्ने धर्ती जन्जिरले भरिएको छ।। 

देखाउँन म सक्दिन तैपनि भन्न सक्छु, 
मेरो हृदय तिम्रै तस्बिरले भरिएको छ।। 

उत्खनन् गरिहेर यो रहस्यमय खाडल। 
बेपत्ता नागरिकको शरीरले भरिएको छ।। 

रहस्य बिक्रम चिमरिया 
बिर्तामोड झापा